انڈر 19 سہ ملکی سیریز کے فائنل میں پاکستان نے زمبابوے کو 9 وکٹوں سے ہرا کر ٹرافی جیت لی، میزبان ٹیم کا159 رنز کا ہدف قومی ٹیم نے 17 ویں اوور میں ایک وکٹ کے نقصان پر پورا کیا ۔
ہرارے میں کھیلے گئے فائنل میچ میں پاکستان نے ٹاس جیت کر زمبابوے کو بیٹنگ کی دعوت دی،میزبان ٹیم 45 ویں اوور میں 158 رنز بناکر آؤٹ ہوگئی،پاکستان کی جانب سے عمر زیب نے 4 اور عبدالسبحان نے 2 کھلاڑیوں کو آؤٹ کیا ۔
جواب میں پاکستان انڈر 19 نے اوپنر سمیر منہاس کی ریکارڈ ساز اننگز کی بدولت 159رنز کا ہدف صرف 17 ویں اوور میں ایک وکٹ پر حاصل کرلیا ۔
سمیر منہاس نے محض 42 گیندوں پر برق رفتار سنچری مکمل کی، یوں یہ یوتھ ون ڈے کی تاریخ کی تیز ترین سنچری بن گئی ۔
سمیر منہاس نے فائنل میں 51 گیندوں پر 114 رنز کی دھواں دار اننگز کھیلی، جس میں 17 چوکے اور 5 چھکے شامل تھے،اس کے علاوہ محمد شایان 38 رنز بناکر ناٹ آؤٹ رہے ۔
اس سے قبل یہ ریکارڈ بھارت کے ویبھو سوریاونشی کے پاس تھا جنہوں نے گزشتہ سال جولائی میں انگلینڈ کے خلاف 52 گیندوں پر سنچری بنائی تھی ۔
پاکستان انڈر 19 نے فائنل میں زمبابوے انڈر 19 کو 9 وکٹوں سے شکست دے کر سہ ملکی سیریز کا ٹائٹل بھی اپنے نام کرلیا ۔
چیئر مین پی سی محسن نقوی نے پاکستان انڈر 19 ٹیم کو زمبابوے میں سہ ملکی سیریز جیتنے پر مبارکباد دیتے ہوئے کہا کہ پاکستان انڈر 19 ٹیم نے اپنے جذبے اور مہارت سے قوم کو قابل فخر بنایا ۔
