ضلع باجوڑ کی تحصیل سالارزئی کے علاقے کارڈوک میں ایک رہائشی گھر کے اندر دھماکے کے نتیجے میں ایک بچہ جاں بحق جبکہ خواتین اور بچوں سمیت متعدد افراد زخمی ہو گئے۔
ابتدائی اطلاعات کے مطابق واقعہ اس وقت پیش آیا جب مبینہ طور پر بچوں کو ایک مارٹر گولہ ملا جسے وہ گھر لے آئے۔ ذرائع کے مطابق گولہ اچانک پھٹ گیا جس سے زور دار دھماکہ ہوا اور گھر میں موجود افراد اس کی زد میں آ گئے۔ اس سے قبل کچھ اطلاعات میں پریشر ککر دھماکے کا ذکر بھی سامنے آیا، تاہم بعد ازاں مارٹر گولہ پھٹنے کی اطلاع موصول ہوئی ہے۔ حکام واقعے کی نوعیت کا تعین کر رہے ہیں۔
دھماکے کے نتیجے میں انس ولد حضرت موقع پر جاں بحق ہو گئے، جبکہ زخمیوں میں واجد ولد عنایت، یامان ولد جہان، جواد ولد جہاں، شاہد ولد عبد الواحد، ایک کمسن بچی ولد فضل واحد، ز (اہلیہ حضرت)، ف (اہلیہ جہان) اور ک (اہلیہ عبد الواحد) شامل ہیں۔
تمام زخمیوں کو فوری طور پر خار ہسپتال منتقل کر دیا گیا جہاں انہیں طبی امداد فراہم کی جا رہی ہے۔ مقامی انتظامیہ اور قانون نافذ کرنے والے اداروں نے علاقے کو گھیرے میں لے کر مزید تحقیقات شروع کر دی ہیں۔
