پشاور (شوبز ڈیسک) — خیبر نیوز پشاور سے نشر ہونے والا منفرد روڈ شو “پیخاور خو پیخاور دے کنہ” ناظرین کی بھرپور توجہ حاصل کر رہا ہے، جس میں تاریخی شہر پشاور کی تہذیب، ثقافت اور قدیم روایات کو معلوماتی انداز میں پیش کیا جاتا ہے۔
اس پروگرام میں دنیا کے قدیم ترین شہروں میں شمار ہونے والے پشاور کی عظمتِ رفتہ، یہاں کے رہائشیوں کے رسم و رواج، ثقافت، مہمان نوازی، روایتی پکوان اور مغلیہ دور کی تاریخی یادگاروں کو اجاگر کیا جاتا ہے۔
شو میں قدیمی بازاروں، تاریخی عمارتوں، مقبروں، کھنڈرات، صدیوں پرانی مساجد اور مقامی ہنرمندوں کے فن و ثقافت کے بارے میں مستند معلومات بھی فراہم کی جاتی ہیں، جس سے ناظرین کو پشاور کی تاریخی اور ثقافتی اہمیت سے آگاہی ملتی ہے۔
پروگرام کے میزبان معروف صحافی اور اینکر جمیل اقبال ہیں، جنہیں ناظرین خیبر، مڈل ایسٹ اور کے ٹو ٹیلی ویژن کے متعدد پروگراموں میں بطور میزبان دیکھ چکے ہیں۔
