پشاور (خصوصی رپورٹر) — پشاور کے مختلف علاقوں میں مشہور برانڈز کی جعلی ادویات کی تھوک سطح پر خرید و فروخت کھلے عام جاری ہے، جس پر شہریوں میں شدید تشویش پائی جا رہی ہے۔
مصدقہ اطلاعات کے مطابق نمک منڈی، کراچی مارکیٹ، ہسپتال روڈ (بیرون آسانی گیٹ) اور اشرف روڈ جیسے علاقوں میں بلڈ پریشر، شوگر، نفسیاتی امراض اور کھانسی کی جعلی ادویات بغیر کسی رکاوٹ کے فروخت کی جا رہی ہیں۔
ذرائع کے مطابق یہ ادویات بظاہر مشہور ملٹی نیشنل کمپنیوں کے ناموں سے مارکیٹ کی جاتی ہیں، جبکہ حقیقت میں یہ مقامی سطح پر تیار کردہ غیر معیاری مصنوعات ہوتی ہیں جن پر اصل ادویات جیسی قیمت درج کی جاتی ہے۔
مزید یہ بھی بتایا جا رہا ہے کہ بعض نام نہاد ڈاکٹر مریضوں کو یہی مشکوک ادویات تجویز کر رہے ہیں، جس سے عوام کی صحت کو سنگین خطرات لاحق ہو رہے ہیں۔
شہریوں اور سماجی حلقوں نے متعلقہ حکام کی خاموشی پر شدید تحفظات کا اظہار کرتے ہوئے فوری کارروائی کا مطالبہ کیا ہے۔
